АҚШ Россия алюминийига божни 200 фоизга оширади
Бу амалда Москвадан ушбу металл импортини тўхтатиб қўяди.
АҚШ Украина босқинининг 1 йиллиги яқинлашаётгани муносабати билан Москвага босим ўтказиш учун шу ҳафтада Россияда ишлаб чиқарилган алюминий импортига 200 фоизлик божлар жорий этишга тайёрланмоқда, деб ёзади "Bloomberg".
Агентликнинг таъкидлашича, бу ҳаракат бир неча ойдан бери кўриб чиқилмоқда.
АҚШ Президенти Жо Байден ҳали чора-тадбирларни амалга оширишга расмий рухсат бермаган ва маъмуриятда бу Америка саноати, жумладан, авиация ва автомобилсозлик саноатига етказилиши мумкин бўлган зарар ҳақида хавотир билдирилган.
Бундай юқори божлар Москвадан АҚШга металл импортини амалда чеклаб қўяди.
Россия дунёдаги иккинчи йирик металл ишлаб чиқарувчи бўлиб, анъанавий равишда РФдан етказиб бериладиган алюминий АҚШ умумий импортининг тахминан 10 фоизини ташкил қилади.
