"Challenger 2" танклари март ойида Украинага келади
Украиналик ҳарбийлар Британияда танкларни бошқаришга ўргатилмоқда.
Британиянинг "Challenger 2" танклари март ойида Украинага келади. Украина ҳарбийлари январь ойи охиридан буён улар билан ишлаш бўйича машғулотлар ўтказмоқда.
Буюк Британия бош вазири Риши Сунак Лондонда Владимир Зеленский билан қўшма матбуот анжуманида Украинага ҳарбий техника етказиб бериш тезлаштирилганини маълум қилди.
Январь ойи охиридан бери Украина танк экипажлари Буюк Британияда "Challenger 2" билан ишлаш учун машғулотлар ўтказмоқда. Танкларни бошқаришга тайёргарлик тахминан бир ярим ой давом этади. Риши Сунакнинг қайд этишича, айни дамда Британия ҳарбийлари Украина Қуролли кучларининг 10 минг жангчисини тайёрламоқда. Бундан ташқари, Сунак украиналик ҳарбийлар, жумладан, қирувчи самолёт учувчилари учун ўқув дастури кенгайтирилганини маълум қилди.
Матбуот анжумани олдидан Риши Сунак ва Владимир Зеленский Англия жанубида жойлашган Дорсет шаҳридаги ҳарбий базага ташриф буюришди, у ерда украиналик ҳарбийлар "Challenger 2"ни бошқаришга ўргатилади.
