Қозоғистон Россиядаги савдо ваколатхонасини ёпди
Бу режалар февраль бошида маълум қилинганди.
Қозоғистон ҳукумати Россиядаги савдо ваколатхонасини тугатиш тўғрисида қарор қабул қилди. Тегишли ҳужжат республика норматив-ҳуқуқий ҳужжатларнинг намунавий назорат банкида эълон қилинди.
“Қозоғистон Республикаси ҳукумати қарор қилади: Қозоғистон Республикаси Савдо ва интеграция вазирлигининг Россия Федерациясидаги Қозоғистон Республикасининг савдо ваколатхонаси давлат муассасаси тугатилсин”, — дейилади ҳужжатда.
Россия ва Қозоғистон ўртасида 1992-йил октябрь ойида ваколатхоналар ташкил этиш тўғрисида шартнома тузилганди. Ҳужжат 2012-йилда ратификация қилинган. Россияда Қозоғистоннинг савдо ваколатхонаси 2009-йилда очилган.
Қозоғистоннинг РФдаги савдо ваколатхонасини тугатиш режалари февраль ойи бошида маълум бўлган эди. Мамлакат саноат ва савдо вазирлиги бу қарорни республика давлат органлари ишини оптималлаштириш билан изоҳлади.
