Янги автотранспорт воситаларини рўйхатдан ўтказишда янги хизмат ишга тушди

 

Эндиликда юридик шахслар Ўзбекистонда ишлаб чиқарилган «Chevrolet» автомобилларини рўйхатдан ўтказишда ишончли вакил учун ишончномани Ягона портал орқали электрон расмийлаштириб, навбатдаги давлат рақам белгиси ва «техпаспорт» учун тўловларни ҳам масофадан амалга оширишлари мумкин. Бу bo‘yicha My.gov.uz да янги хизмат ишга туширилди. 

 

Бунинг учун аризачи қуйидаги маълумотларни тўлдириши керак:

 

• янги автотранспорт воситасининг шартнома рақами;

• автотранспорт воситасини рўйхатдан ўтказиш учун юридик шахснинг ишончли вакили маълумотлари.

 

Ариза босқичлари якунида автотранспорт воситасини давлат рўйхатидан ўтказишда Давлат рақам белгиси ҳамда техпаспорт учун 2 та тўлов устуни шаклланади.

 

Автотранспорт воситасининг давлат рақам белгиси учун тўлов:

—  Ягона портал орқали топширилганда миқдори — 450 минг сўм (1.5 БҲМ)

Автотранспорт воситаси рўйхатдан ўтказилганлиги тўғрисидаги гувоҳнома учун тўлов:

—  Ягона портал орқали топширилганда миқдори — 210 минг сўм (0.7 БҲМ)

 

Шунингдек, тўловлар амалга оширилгач,маълумотлар Йўл ҳаракати хавфсизлиги хизматига юборилади. Якуний натижада ишончли вакил учун ҚР кодли ишончнома шаклланади.

 

Энди ишончли вакил Йўл ҳаракати хавфсизлиги хизматининг исталган бўлимига ташриф буюриши мумкин. У ерда инспектор томонидан автотранспорт воситаси маълумотлари аризадаги маълумотлар билан солиштирилади.

 

Шундан сўнг автотранспорт воситаси рўйхатдан ўтказилганлиги тўғрисидаги гувоҳнома (техпаспорт) ҳамда Давлат рақам белгиси тақдим этилади.

 

Хизмат синов тариқасида ишга туширилган бўлиб, унга доир таклифларни хизматнинг исталган қадамида қолдириш мумкин.