Белгияда оғир аҳволда қолган ўзбекистонлик ватанга қайтарилди

Белгияда оғир аҳволда шифохонага ётқизилган Ўзбекистон фуқаросининг ҳаёти шифокорлар ва ўзбек дипломатларининг ҳамкорликдаги саъй-ҳаракатлари туфайли сақлаб қолинди. Бу ҳақда “Дунё” АА хабар берди.

 

Маълум қилинишича, Самарқанд вилояти Ургут туманида туғилган фуқаро В.А. Нидерландияда қурилиш соҳасида ишлаётган вақтида ўткир тиш инфекцияси туфайли соғлиғида жиддий асоратлар юзага келган. У малакали тиббий ёрдамга ўз вақтида мурожаат қилмагани сабаб организмида оғир яллиғланиш жараёни ривожланган.

 

Брюссел орқали Ўзбекистонга қайтаётган вақтда фуқаронинг аҳволи кескин ёмонлашган ва у зудлик билан Брюсселдаги Cент-Люк университет клиникасига ётқизилган. Шифокорлар унинг аҳволини критик деб баҳолаган.

 

Клиника мутахассислари беморда иккита мураккаб жарроҳлик амалиётини ўтказган. Шунингдек, у узоқ вақт сунъий нафас олдириш аппаратига уланган ҳолда жонлантириш бўлимида ҳушсиз аҳволда қолган.

 

Хабарга кўра, бемор шифохонага ётқизилган илк кундан бошлаб Ўзбекистон элчихонаси ходимлари касалхона маъмурияти, шифокорлар ва фуқаронинг яқинлари билан доимий алоқада бўлган. Элчихона томонидан зарур консуллик ва ташкилий ёрдам кўрсатилиб, фуқаронинг даволаниши ҳамда кейинчалик ватанга қайтиши назорат қилиб борилган.

 

Белгия шифокорларининг тезкор ва профессионал ёрдами, шунингдек ўзбек дипломатларининг кўмаги туфайли фуқаронинг ҳаёти сақлаб қолинган. Узоқ давом этган даволаниш ва реабилитациядан сўнг унинг аҳволи барқарорлашган ва Ўзбекистонга қайтиши ташкил этилган.

 

Ҳозирда В.А. Ўзбекистонда бўлиб, оиласи даврасида даволанишни давом эттирмоқда.