АҚШда ўзбекистонлик талаба вафот этди
Марҳум Stony Brook университетида компьютер технологиялари ва информатика йўналишида таҳсил олаётган бўлган.
Эл-юрт умиди жамғармаси стипендиатларидан бири Муҳаммадюсуф Фахриддинов АҚШда вафот этди. Бу ҳақда жамғарманинг расмий Теlegram-каналида маълум қилинди.
Қайд этилишича, марҳум АҚШдаги Stony Brook университетида компьютер технологиялари ва информатика йўналиши бўйича бакалавриатнинг 4-босқичида таҳсил олаётган бўлган. У жамғарманинг иқтидорли ва истиқболли стипендиатларидан бири сифатида эътироф этилган.
Жамғарма маълумотига кўра, Муҳаммадюсуф Фахриддинов ўзининг мақсадга интилувчанлиги, юқори тайёргарлик даражаси ҳамда танлаган соҳасига садоқати билан ажралиб турган.
Ҳозирда жамғарма Ўзбекистон Республикаси Ташқи ишлар вазирлиги ва консуллик идоралари билан ҳамкорликда воқеа тафсилотларини аниқлаш ишларини олиб бормоқда.
Шунингдек, марҳумнинг жасадини Ўзбекистонга олиб келиш билан боғлиқ барча ташкилий масалалар назоратга олингани билдирилди.
Жамғарма марҳумнинг оила аъзолари ва яқинларига чуқур ҳамдардлик изҳор этди.
