Швеция миграция қонунчилигини бузган ўзбекистонликларни депортация қилди
20 нафар Ўзбекистон фуқароси чартер рейс билан Тошкентга етиб келди.
Миграция қонунчилигини бузгани учун депортация қилинган 20 нафар Ўзбекистон фуқароси Швециядан чартер рейс орқали Тошкент халқаро аэропортига етиб келди. Бу ҳақда “Дунё” АА хабар берди.
Маълум қилинишича, фуқароларнинг ортга қайтиши Ўзбекистон ва Швеция ваколатли органларининг мувофиқлаштирилган ҳамкорлиги натижаси бўлди. Икки томонлама ҳамкорлик доирасида барча ташкилий ва ҳуқуқий тартиб-таомиллар, жумладан, фуқароларни идентификация қилиш, ҳужжатларни расмийлаштириш ва хавфсиз ташишни таъминлаш масалалари тезкорлик билан келишиб олинди.
“Ўзбекистон миграция масалалари, жумладан, миграция қонунчилиги бузилишининг олдини олиш ва хориждаги Ўзбекистон фуқароларининг ҳуқуқларини ҳимоя қилиш бўйича хорижий ҳамкорлар билан муносабатларни доимий равишда давом эттирмоқда”, дейилади хабарда.
Аввалроқ 1 май куни АҚШдан Ўзбекистонга депортация қилинган 26 нафар фуқаро қайтарилганди. Покистонда 21 йил ноқонуний яшаган аёл 2 май куни Ўзбекистон элчихонаси дипломатлари кўмагида ватанга олиб келинганди.
