Мактаб ўқувчилари ЙТҲ содир этди: қурбон бор
Cobalt бошқарув йўқотилиши натижасида йўлдан чиқиб кетган.
Навоий вилояти Кармана туманида мактаб ўқувчилари иштирокида йўл-транспорт ҳодисаси содир бўлди. Бу ҳақда вилоят ЙҲХБ хабар берди.
Маълум қилинишича, воқеа 22 апрель куни соат 21:00 атрофида туманнинг Малик маҳалласида бўлган. Cobalt автомобилида 22-умумтаълим мактабининг икки ўқувчиси бўлган. Машина йўлдан чиқиб кетиб ЙТҲ юз берган.
Натижада 9-синф ўқувчиси И.Ҳ. шифохонада вафот этган. 11-синф ўқувчиси эса тан жароҳати олиб, шифохонага ётқизилган.
Шундан сўнг ЙҲХБ мактабда юқори синф ўқувчилари иштирокида муҳокама йиғилиши ўтказган.
Маълумотларга кўра, машина шифохонадаги ўқувчининг отасига тегишли бўлган. Бироқ у рулни шеригига берганини айтган. Машинани ким бошқарганини аниқлаш учун экспертиза тайинланиши мумкин.
