Европа Россияга чекловларни четлаб ўтишга ёрдам бераётган Марказий Осиё давлатларига санкция жорий этмоқчи
ЕИ раҳбарияти минтақадан РФга икки мақсадли товарлар экспорти ошганини қайд этган.
Евроиттифоқ Россияга савдо чекловларини четлаб ўтишда ёрдам бераётган Марказий Осиё давлатларига қарши санкция жорий этиши мумкин.
The Telegraph нашри маълумотларига кўра, ЕИ раҳбарияти Марказий Осиё давлатларидан Россияга турли товарлар, биринчи навбатда икки мақсадли маҳсулотлар экспорти ошганини сезган. Масалан, кир ювиш машиналари ва ишлатилган автомобиллар сотуви кўпайган. Европа амалдорлари бу каби маҳсулотлар РФга савдо чекловларини четлаб ўтишга ёрдам беришидан хавотирда.
Евроиттифоқ раҳбарлари Марказий Осиё давлатлари вакиллари билан музокара ўтказиш ниятида. Улар минтақа давлатларини санкцияларни четлаб ўтишга ёрдам беришнинг салбий оқибатларидан огоҳлантирмоқчи. Агарда ЕИ Москвага реэкспорт ҳолатлари мавжудлигини исботласа, Европа бунга алоқадор давлатларга ўз бозорига киришни чеклайди.
Эслатиб ўтамиз, Қозоғистон 1 апрелдан Россияга экспортни реал вақт режимида кузатиш тартибини жорий этади.
