Бухорода касал эркакнинг расмидан фойдаланиб, тиланчилик қилган аёл ушланди
У бегона эркакни ўзининг эри эканини айтиб, масжид ёнида тиланчилик қилган.
Ижтимоий тармоқларда Бухорода бегона эркакни ўзини эри деб тиланчилик билан шуғулланиб келган фирибгар аёл қўлга олингани ҳақида хабар тарқалди. Ҳолат юзасидан вилоят ИИБ ахборот хизмати маълумот берди.
Маълум бўлишича, Ромитан тумани Боғисайдон маҳалласида яшовчи X.С. исмли аёл туманнинг Ҳофизработ маҳалласида яшовчи, 1985 йилда туғилган бошқа бир A.Н. исмли эркакнинг хасталаниб ётгани акс этган расмини ижтимоий тармоқлардан кўчириб олиб, “Менинг турмуш ўртоғим оғир бетоб, жигар серрози касаллигига чалинган” дея Бухоро шаҳридаги “Абу Хафс Кабир” жоме масжидига кириш жойида зиёратга келган фуқаролардан тиланчилик қилиб келган.
Ҳозирги кунда мазкур ҳолат юзасидан Бухоро шаҳар ИИО ФМБ томонидан терговга қадар текширув ҳаракатлари олиб борилмоқда.
“Текширув якуни бўйича қонунчиликда белгиланган тартибда жавобгарлик масалалари ҳал этилади”, — дейилади хабарда.
