Ўзбекистонда ҳарорат 42 даражагача кўтарилади
«Ўзгидромет» ҳаво ҳароратининг исишидан огоҳлантирди.
Эрон ҳудудларидан иссиқ ҳаво оқимлари кириб келиши сабабли республика ҳудудида ҳаво ҳарорати максимал даражага чиқиши кутилмоқда. Бу ҳақда «Ўзгидромет» директори Facebook’даги саҳифасида хабар берди.
Шерзод Ҳабибуллаевнинг маълум қилишича, Эрон ҳудудидан 5−8 июнь кунлари Ўзбекистонга иссиқ ҳаво кириб келиши ҳисобига ҳаво ҳарорати 42 даражагача кўтарилиши мумкин. Айрим жойларда 7-8 июнь кунлари шамол тезлиги кучайиб, чанг-тўзон кузатилиши мумкин. Натижада айрим ҳудудларда максимал ҳаво ҳарорати одатдаги мэъёридан юқори бўлиши кутилмоқда.
Жумладан, 5−6 июнда ҳарорат Қорақалпоғистон Республикаси, Хоразм вилоятида 40-41 даражагача кўтарилади. 6−8 июнда эса Бухоро, Навоий, Қашқадарё, Сурхондарё вилоятларида 40-42 даражагача иссиқ бўлади. Шунингдек, 5−8 июнда Тошкент, Самарқанд, Жиззах, Сирдарё вилоятларида 38-40 даражагача, 7−8 июнда Фарғона водийси вилоятларида ҳарорат 36-39 даражагача кўтарилиши кутилмоқда.
