Шавкат Мирзиёев Ломбардия губернатори билан учрашув ўтказди
Ўзбекистон билан Ломбардия вилояти ўртасида кенг кўламли ҳамкорлик дастури тайёрланади.
Италияга расмий ташрифининг иккинчи кунида Шавкат Мирзиёев Ломбардия губернатори Аттилио Фонтана билан учрашув ўтказди. Бу ҳақда Президент матбуот хизмати хабар берди.
Учрашув аввалида давлат раҳбари Аттилио Фонтанани губернатор этиб қайта сайлангани билан табриклади ва ушбу лавозимдаги фаолиятига муваффақиятлар тилади. Шунингдек, Италия президенти Сержо Маттарелла ва Бош вазир Жоржа Мелони билан ўтган музокаралар самарали бўлгани мамнуният билан қайд этилиб, улар давомида ҳудудлараро алоқаларни ривожлантириш қўллаб-қувватлангани таъкидланди.
Учрашувда, энг аввало, савдо-иқтисодий соҳадаги ўзаро манфаатли ҳамкорликнинг амалий жиҳатлари муҳокама қилинди.
«Ўтган йилда Ўзбекистон ҳудудларининг Ломбардия билан товар айирбошлаш ҳажми 83 фоизга ошди. Апрель ойида Милан ва Тошкент ўртасидаги авиақатновлар қайта тикланди. Ҳудуднинг Pietro Fiorentini, Terranova, Danieli, Fin. Opera каби етакчи компаниялари билан мустаҳкам шериклик алоқалари йўлга қўйилган», — дейилади хабарда.
Шавкат Мирзиёев шунингдек, қўшма савдо ва инвестиция лойиҳалари портфелини кенгайтириш, Италиянинг илғор технология ва билимларини Ўзбекистон иқтисодиёти тармоқларига янада кенг жалб қилиш муҳимлигини таъкидлади. Бундан ташқари, Ломбардия билан кенг кўламли ҳамкорлик дастурини тез фурсатда тайёрлаш, Самарқандда қўшма инвестиция форумини ўтказиш зарурлиги кўрсатиб ўтилди.
Саноат кооперациясини ривожлантириш, тадбиркорлик ташаббусларини илгари суриш учун қулай шароитлар яратиш, тиббиётда давлат-хусусий шериклик лойиҳаларини амалга ошириш, инновацияларни ривожлантириш, маданий-гуманитар алоқаларни кенгайтириш, шу жумладан маданият кунларини ўтказиш масалаларига алоҳида этътибор қаратилди.
Губернатор Ломбардия ишбилармон доираларининг Ўзбекистондаги лойиҳа ва ташаббуслари ҳар томонлама қўллаб-қувватланаётгани учун Ўзбекистон Президентига самимий миннатдорлик билдирди ҳамда Ўзбекистон билан кенг кўламли ва ўзаро манфаатли шерикликка кўмаклашишга тайёрлигини таъкидлади.
Учрашув якунида Шавкат Мирзиёев раҳбари Аттилио Фонтанага 2026 йилда Ломбардияда бўлиб ўтадиган қишки Олимпия ўйинларига тайёргарлик кўришда муваффақиятлар тилади.
