Соғлиқни сақлаш соҳасида Италия тажрибаси жорий этилади

 

Ўзбекистон элчихонаси кўмагида соғлиқни сақлаш вазири Амрилло Иноятов ва Италиянинг Ломбардия соғлиқни сақлаш ҳудудий маслаҳатчиси Гвидо Бертоласо ўртасида онлайн учрашув ташкил этилди, деб хабар бермоқда «Дунё».

 

Келтирилишича, вазир Ўзбекистон тиббиёт, тиббий таълим ва фармацевтика соҳаларида Италия тажрибасини жорий этиш мақсадида бир қатор муҳим таклифлар, жумладан икки мамлакат соҳа вакиллари, етакчи компаниялари иштирокида Ўзбекистонда тиббиёт ва фармацевтика саноати форумини ташкил этиш ташаббуси билдирилди.

 

Соғлиқни сақлаш вазири Ўзбекистондаги мавжуд соғлиқни сақлаш тизимини янада ривожлантириш бўйича тегишли учрашув ва музокаралар ўтказиш мақсадида Ломбардия делегациясини Ўзбекистонга ташриф билан келишга таклиф қилди. Ломбардия соғлиқни сақлаш ҳудудий маслаҳатчиси Гвидо Бертоласо билдирилган таклифларни катта қизиқиш билан қабул қилиб, Ломбардия илғор тажрибасини Ўзбекистонда жорий этиш бўйича ўзаро ҳамкорлик қилишга тайёр эканлигини маълум қилди.

 

Гвидо Бертоласонинг айтишича, Ломбардия соғлиқни сақлаш тизими инновацион тиббий ва жарроҳлик технологиялари кенг қўлланилиши, шифокорларни ўқитишнинг замонавий усулларидан фойдаланиши ҳамда илмий изланишлар олиб борилиши билан ажралиб туради.

 

Учрашув якунида муҳокама қилинган масалалар ижроси бўйича «Йўл харита»сини ишлаб чиқиш юзасидан келишувга эришилди.