Байден фаластинликлар учун 100 миллион долларлик инсонпарварлик ёрдамини эълон қилди

 

АҚШ президенти Жо Байден чоршанба куни берган баёнотида, 100 миллион доллар «бир миллиондан ортиқ кўчирилган ва можаролардан азият чеккан одамларни тоза сув, озиқ-овқат, гигиена воситалари, тиббий ёрдам ва бошқа зарур маҳсулотлар билан таъминлаш» учун сарфланишини айтди.

 

Оқ уйнинг таъкидлашича, «Қўшма Штатлар ишончли ҳамкорлар, жумладан, БМТ агентликлари ва халқаро ноҳукумат ташкилотлари орқали гуманитар ёрдам кўрсатмоқда».

 

Президент Байденнинг сўзларига кўра, Ғазо секторининг тинч аҳолиси вазиятда «айбдор эмас ва жабр кўрмаслиги керак. Фуқаролар ҳаётини ҳимоя қилиш ва муҳтожларга зудлик билан ёрдам бериш керак».

 

Оқ уй баёнотида, шунингдек, «Қўшма Штатлар минтақадаги ҳамкорлар билан яқин алоқани давом эттириши, хавфсизликка эришиш ва ёрдам беришга ҳаракат қилаётганларни қўллаб-қувватлаш ҳамда [фуқароларнинг] озиқ-овқат, сув, тиббий ёрдам ва уй-жойдан фойдаланишини осонлаштириш муҳимлигини таъкидлайди».

 

Аввалроқ АҚШ президенти Тел-Авивда сўзга чиқиб, Исроилни тинч аҳолининг оғир аҳволини енгиллаштириш учун Мисрдан келаётган инсонпарварлик ёрдамининг Ғазога киришига рухсат беришга чақирганди. 

 

Байденнинг ташрифи якунида Исроил бош вазири Бинямин Нетаняҳунинг идораси Исроилнинг Миср орқали Ғазо жанубига озиқ-овқат, сув ва дори-дармонларни жўнатишига рухсат беришини билдирган. Шу билан бирга, у ҲАМАС гаровга олганларни озод қилмагунча Исроилдан ёрдамга рухсат бермаслигини яна бир бор таъкидлади.