X платформаси аудио ва видеоқўнғироқлар функцияси пайдо бўлди
Бу ҳақда ижтимоий тармоқ эгаси Илон Маск маълум қилди.
X (собиқ Twitter) ижтимоий тармоғи эгаси Илон Маск энди фойдаланувчилар аудио ва видеоқўнғироқларни амалга ошириши мумкинлигини эълон қилди.
Маск видео ва аудиоқўнғироқларнинг дастлабки версияси фойдаланувчилар учун пайдо бўлганини таъкидлади. Шу тариқа у янги функцияни қандай ёқиш ҳақидаги саволга жавоб қайтарди.
Қайд этилишича, функция ҳозирча фақат iOS фойдаланувчилари учун мавжуд. Аниқлик киритилишича, ушбу параметр автоматик тарзда ёқилади.
Агар сиз X тармоғидаги қўнғироқларни қабул қилишни истамасангиз, унда шахсий хабарлар созламасига кириб, уни ўчириб қўйишингиз керак бўлади. Бундан ташқари, сизга кимлар, яъни текширилган аккаунтлар ёки фақатгина обуначилар қўнғироқ қилиши мумкинлигини танлашингиз ҳам мумкин.
Аввалроқ, Илон Маск Х ижтимоий тармоғини барча фойдаланувчилар учун пуллик қилмоқчи эканини айтганди.
