Илҳом Алиев рафиқаси билан Бухорога жўнаб кетди
Олий мартабали меҳмонни Олий Мажлис Қонунчилик палатаси Спикери, Тошкент шаҳар ҳокими ва бошқа расмийлар кузатиб қўйди.
Шавкат Мирзиёевнинг таклифига биноан давлат ташрифи билан Ўзбекистонда бўлиб турган Озарбайжон Президенти Илҳом Алиев 24 август куни Бухоро шаҳрига жўнаб кетди.
«Тошкент-Ҳумо» халқаро аэропортида олий мартабали меҳмонни Олий Мажлис Қонунчилик палатаси Спикери Нуриддин Исмоилов, Тошкент шаҳар ҳокими Шавкат Умурзоқов ва бошқа расмийлар кузатиб қўйди.
Ташриф дастури доирасида 23 август куни Тошкент шаҳрида Ўзбекистон ва Озарбайжон президентлари иштирокида олий даражадаги музокаралар ҳамда Олий давлатлараро кенгашнинг учинчи йиғилиши бўлиб ўтди.
Унда икки давлат ўртасидаги товар айирбошлаш ҳажмини ошириш, ҳудудлар ва ишбилармон доиралар ўртасидаги ҳамкорликни кенгайтириш, транспорт-транзит имкониятларидан самарали фойдаланиш ҳамда маданий-гуманитар алоқаларни ривожлантириш масалалари муҳокама қилинди.
Шунингдек, давлат раҳбарлари халқаро ва минтақавий кун тартибидаги долзарб масалалар юзасидан фикр алмашдилар.
Музокаралар якунида қатор муҳим ҳужжатлар имзоланди ва иқтисодий ҳамда бошқа йўналишларда муҳим лойиҳалар ишга туширилди.
