Украина қарши ҳужум бошланганидан бери 90 минг аскарини йўқотди — Шойгу
Россия мудофаа вазирининг айтишича, Россия Украина бўйича мулоқотга тайёр.
Киев 90 мингдан ортиқ ҳарбий хизматчи, 600 га яқин танк ва турли тоифадаги 1900 га яқин зирҳли техникасини йўқотди.
Россия мудофаа вазири Сергей Шойгу 10-Пекин Сяншан форумида Украинадаги махсус операцияда Россия қўшинлари ўзига юкланган вазифаларни услубий тарзда бажараётганини маълум қилди.
“Россия қуролли кучлари ўзларига юкланган вазифаларни услубий ва ишончли бажаришда ва тинч аҳоли хавфсизлигини таъминлашда давом этади”, — деди Шойгу.
Вазирнинг таъкидлашича, фақат 4 июндан бошлаб, қарши ҳужум пайтида Украина катта йўқотишларга дуч келди.
“Киев 90 мингдан ортиқ ҳарбий хизматчини, олти юзга яқин танкни ва турли тоифадаги 1900 га яқин зирҳли техникасини йўқотди. Шу билан бирга, жанг майдонида тактик жиҳатдан аҳамиятли муваффақиятларга эришилмади”, — деб эслатди Шойгу.
Вазирнинг сўзларига кўра, Ғарб Украинадан Россияга “стратегик мағлубият” етказиш учун сарфланадиган материал сифатида фойдаланишга ҳаракат қилмоқда.
“Россиянинг ўз хавфсизлигини таъминлаш бўйича қонуний ҳуқуқларига эътибор бермай, Оқ уй ўзи назорат қилаётган НАТО блокини шарқда кенгайтиришга қатъий интилди. Бу агрессив қадамлар бизни қарши чоралар кўришга мажбур қилди. Бунга жавобан Ғарб бизга қарши бошланган гибрид урушда Россияни “стратегик мағлубиятга учратиш” йўналишини очиқдан-очиқ белгилаб олди”, — дея қўшимча қилди мудофаа вазирлиги раҳбари.
