Қозоғистонда мамлакат тарихидаги илк Қурултой учун сайлов бошланди
Сайловда жами 12 605 788 нафар фуқаро иштирок этиши кутилмоқда.
Қозоғистонда мамлакат тарихидаги илк Қурултой учун сайлов жараёни бошланди. Бу ҳақда Теngrinews.kz маълум қилди.
Маҳаллий вақт билан соат 07:00 ҳолатига кўра, республиканинг 20 та ҳудудидаги 10 363 та сайлов участкасида овоз бериш бошланди. Яна 107 та участка ҳудудий комиссиялар қарорига кўра, соат 06:00 дан фаолият юритган. Шунингдек, 16 та хорижий давлатда ташкил этилган 19 та сайлов участкаси ҳам фуқароларни қабул қилмоқда. Сайловда жами 12 605 788 нафар фуқаро иштирок этиши кутилмоқда.
Қозоғистонда 1 июлдан янги Конституция кучга кирган. Унинг лойиҳаси март ойида ўтказилган референдумда қарийб 90 фоиз овоз билан маъқулланган. Янги Конституция амалдаги президент Қосим-Жўмарт Тўқаевга яна бир бор президентлик сайловида иштирок этиш имконини беради.
Мамлакатнинг икки палатали парламенти — Сенат ва Мажлис 30 июнь куни ўз фаолиятини расман якунлаган. Конституциявий ислоҳот натижасида икки палатали парламент ўрнига бир палатали Қурултой ташкил этилади.
Шунингдек, ислоҳот доирасида витсе-президент лавозими қайта тикланади ва янги маслаҳат органи — Халқ кенгаши ташкил этилади. Унинг аъзолари президент томонидан тайинланади.v
