Россия буғдой экспортини вақтинча тақиқламоқчи
Бу ҳақда норматив-ҳуқуқий ҳужжатлар порталида ҳукумат қарори лойиҳаси жойлаштирилган.
Россия Федерацияси Қишлоқ хўжалиги вазирлиги мамлакат ҳудудидан қаттиқ буғдой экспортини вақтинча тақиқлашни таклиф қилди. Бу ҳақда норматив-ҳуқуқий ҳужжатлар порталида ҳукумат қарори лойиҳаси жойлаштирилган.
“Россия Федерациясидан 2023 йил 1 декабрдан 2024 йил 31 майгача, шу жумладан, қаттиқ буғдой экспортини вақтинчалик тақиқлаш белгилансин. ЕОИИ товар кодлари бўйича: 1001 11 ва 1001 19", — дейилади ҳужжат лойиҳаси матнида.
Қонунда бир қатор истиснолар ҳам кўзда тутилган: хусусан, ушбу тақиқ ҳукуматлараро келишувлар доирасида ҳамда гуманитар ёрдам мақсадларида Россиядан қаттиқ буғдой экспортига тааллуқли эмас.
Шунингдек, ушбу тақиқ қаттиқ буғдойни Россиянинг хориждаги ҳарбий базалари, Шпицберген архипелагидаги ва Бойқўнғир космодромидаги Россия ташкилотлари фаолиятини қўллаб-қувватлаш, Абхазия ва Жанубий Осетия республикалари ва Иттифоқ таркибидаги Беларусга олиб чиқиш учун ҳам қўлланилмайди.
