Германия Украинага ҳарбий ёрдамни икки баравар оширмоқчи
Бу ҳақда Германия Мудофаа вазирлиги маълум қилди.
Ўтган ҳафта Германия ҳукумати Украинага ҳарбий ёрдам учун давлат бюджетидан ушбу мақсадлар учун ажратилган 4 миллиард еврога қўшимча равишда яна 4 миллиард евро ажратишга қарор қилди. Бу ҳақда Bild нашри Германия Мудофаа вазирлигидаги манбаларга таяниб хабар берди.
Дастлаб Германия 2024 йилда Украинага қурол етказиб бериш учун 4 миллиард евро ажратди. Бироқ деярли барча маблағлар ваъда қилинган ёрдамни етказиб бериш учун “захираланган”. Германия Мудофаа вазирлигида янги ҳарбий ёрдам пакетлари учун 120 миллион евро қолди.
Bild нашрининг ёзишича, Германия мудофаа вазири Борис Писториус Украинага ёрдам бериш учун яна 5 миллиард евро ажратишни талаб қилган. Натижада ҳукумат 4 миллиард евро ажратишга рози бўлди. Кейинги ҳафта Бундестаг Бюджет қўмитаси расман давлат бюджетига ўзгартиришлар киритиш бўйича қарор қабул қилишни режалаштирмоқда.
Нашрнинг қайд этишича, Германия Мудофаа вазирлигида яна 2 миллиард евро мавжуд. Департамент ундан “узоқ муддатли мудофаа шартномаларини амалга ошириш учун маблағ” сифатида фойдаланиши мумкин. Уруш бошлангандан бери Германия Украинага 4,2 миллиард евродан ортиқ ҳарбий ёрдам жўнатди.Умумий ёрдам ҳажми, жумладан, ҳарбий, гуманитар ва молиявий ёрдам қарийб 24 миллиард еврони ташкил этди.
