Чехия Россия активларини музлатиб қўйди
Ҳукумат бошқа Европа давлатларини ҳам шундай йўл тутишга чақирди.
Чехия ҳукумати ушбу мамлакат ҳудудида жойлашган, ҳали санкцияларга дучор бўлмаган Россия давлат активларини музлатиб қўйди.
"Менинг таклифим билан ҳукумат бугун Чехия Республикасидаги Россия давлат активларининг музлатилишини маъқуллади. Бу Россия украиналикларнинг қотилликларини молиялаштирган тижорат фаолиятини тугатади", — деди Чехия ташқи ишлар вазири Ян Липовский.
Вазирнинг таъкидлашича, гап Россия Федерацияси Президенти маъмуриятига тегишли "Чет элдаги активларни бошқариш корхонаси"нинг активлари ҳақида кетмоқда.
Унга кўра, санкциялар, асосан, Прага ва Карлови Варидаги кўчмас мулкни ўз ичига олган. Бу мулклар сотилмаслиги учун блокланади. Мазкур биноларни россияликлардан ижарага олганлар у ерда қолишлари мумкин, аммо энди улар руслар кира олмайдиган махсус ҳисоб рақамига ижара ҳақини тўлашлари керак.
Липовский бошқа Европа давлатларини ҳам ўз ҳудудида қолаётган Россия активларини музларишга чақирди.
