Илон Маск Исроилга йўл олди
Маск Х ижтимоий тармоғидаги антисемитистик постлар туфайли танқид қилинган эди.
Илон Маскнинг Исроилга ташрифи президент Ицхак Герцог маъмурияти томонидан тасдиқланди. Маск аввалроқ Х ижтимоий тармоғидаги антисемитистик постлар туфайли танқид қилинган эди.
Исроил президенти Ицхак Герцог 27 ноябр, душанба куни Қуддусда Х (собиқ Twitter) ижтимоий тармоғи эгаси Илон Маск билан учрашади. У бир қатор антисемитизм айбловларидан сўнг мамлакатга ташриф буюришга қарор қилди. Бу ҳақда The Times of Israel давлат раҳбари идорасига таяниб ёзмоқда.
Америкалик тадбиркор билан суҳбатда Герцог «интернетда антисемитизмнинг кучайишига қарши кураш чоралари зарурлигини» таъкидламоқчи. Ғазо секторида ҲАМАС томонидан гаровга олинган баъзи шахсларнинг оила аъзолари ҳам учрашувга қўшилиши кутилмоқда.
Сўнгги ҳафталарда Маск Х платформасида антисемитизм ва нацистларга оид постлари туфайли танқид остига олинди. Хусусан, у фитна назарияси тарафдорининг яҳудий ҳамжамоаларини «оқ танлиларга нисбатан нафрат» тарқатишда айблаган, шунингдек, антисемитизмга қарши курашувчи Америка яҳудийлари ташкилоти - Антидиффамацион лига «де-факто оқ танлиларга қарши ирқчилик, осиёликларга қарши ирқчилик ёки ҳар қандай ирқчиликни тарғиб қилиши» ҳақида ёзган твитини қўллаб-қувватлаган.
Бундан ташқари, Media Matters нотижорат ташкилоти Apple, Oracle ва IBM рекламаларига эътибор қаратди, улар X’да Ҳитлер ва нацизмни мақтаган постлар ёнида кўрсатилган. Натижада, шу ва бошқа баъзи компаниялар Маскнинг ижтимоий тармоғидаги рекламаларини тўхтатишга қарор қилди.
