Жаҳон банки IT соҳасини ривожлантириш учун Ўзбекистонга 50 миллион доллар ажратади
Янги лойиҳа Ўзбекистонга ITES хизматлари секторидан иқтисодий ўсиш, янги иш ўринлари яратиш ва хорижий сармояларни жалб қилиш катализатори сифатида фойдаланишга ёрдам беради.
Жаҳон банки Ўзбекистонда “рақамли инклюзивлик” лойиҳасини амалга ошириш учун 50 миллион доллар миқдорида имтиёзли кредит ажратади, дея хабар қилди ташкилот матбуот хизмати.
Маълумотларга кўра, лойиҳа ҳукуматнинг рақамли иқтисодиётни ривожлантириш бўйича саъй-ҳаракатларини қўллаб-қувватлайди, шунингдек, қишлоқ ва чекка ҳудудлардаги минглаб ёшларнинг рақамли кўникмаларга ўргатиш ва ахборот технологиялари хизматларида ишга жойлашиш имкониятларини кенгайтиради.
Жаҳон банки томонидан қўллаб-қувватланадиган янги лойиҳа Ўзбекистонга ITES хизматлари секторидан иқтисодий ўсиш, янги иш ўринлари яратиш ва хорижий сармояларни жалб қилиш катализатори сифатида фойдаланишга ёрдам беради. Бу мамлакатнинг қишлоқ ва чекка ҳудудларида истиқомат қилувчи 30 ёшгача бўлган минглаб ёшларни ўқитиш мақсадида Рақамли технологиялар вазирлиги ҳузуридаги IT-Park томонидан амалга оширилади.
Лойиҳа доирасида ушбу шахсларни иш билан таъминлайдиган ITES компанияларига турли имтиёзлар берилади, дейилади хабарда.
Аниқлик киритилишича, 2029 йилда Ўзбекистоннинг ITES хизматлари соҳасида 25 мингга яқин киши иш билан таъминланади ва 15 мингга яқин фуқаро турдош соҳаларда иш топиши мумкин бўлади.
