Трамп Колорадо судининг сайловда қатнашишни тақиқлаш тўғрисидаги қарорига қарши шикоят киритди
Дональд Трамп АҚШ Олий судидан Колорадо судининг ушбу штатдаги президентликка номзодини қўймаслик ҳақидаги қарорини бекор қилишни сўради.
Дональд Трамп АҚШ Олий судидан Колорадо судининг ушбу штатдаги президентликка номзодини қўймаслик ҳақидаги қарорини бекор қилишни сўради.
Колорадо судидан ташқари, Трампни республикачиларнинг праймериз номзодлари рўйхатидан чиқариб ташлаш тўғрисидаги қарорни Мэн штати Давлат котиби ҳам қабул қилган. Сешанба куни собиқ президентнинг адвокатлари бу масалада маҳаллий судга апелляция шикояти берган.
Трампнинг суд жараёнини бошлаган рақибларининг фикрича, собиқ президент 2020 йилги президентлик сайлови натижаларини бекор қилмоқчи бўлган ва ўз тарафдорларини 2021 йил январида Капитолийга бостириб киришга ундаган.
Мэн штати Давлат котиби Шенна Беллоуз ва Колорадо Олий суди ўз қарорларини АҚШ Конституциясидаги "исён ёки қўзғолон қилганларнинг федерал лавозимни эгаллашини тақиқловчи" 14-тузатишга асослади.
Сайловолди кампанияси вакиллари Колорадо Олий суди ва АҚШ президенти Жо Байденни "америкалик сайловчиларнинг овоз бериш ҳуқуқини чеклаш учун қўлидан келган барча ишни қилишда” айблади.
"Бу сайловга аралашишнинг Америкага хос бўлмаган, конституцияга зид ҳаракатдир. Биз Колорадо Олий судининг нотўғри қарорини бекор қилишни, шунингдек, ноябрь ойида эркин ва адолатли сайловни ўтказишни талаб қиламиз", — дея таъкидлади Трампнинг сайловолди кампанияси вакили Стивен Чунг.
Агар Олий суд Дональд Трампнинг сайловда иштирок этишига рухсат берса, бу қарор бутун мамлакат бўйлаб амал қилади.
