Россияда бугундан президентлик сайловлари бошланди
Мамлакатда овоз бериш уч кун давом этади.
Россияда 15 март, жума куни Камчатка ва Чукоткада илк сайлов участкалари очилди. Россия Федерациясида президентлик сайловлари 15-17 март кунлари бўлиб ўтади, асосий овоз бериш 17 март — якшанба куни ўтказилади.
Россия Федерацияси президенти сайловида овоз бериш учун 94 мингдан ортиқ сайлов участкалари ташкил этилди, 113,5 миллионга яқин сайлов бюллетенлари тайёрланди. 25 февралдан бориш қийин бўлган жойларда муддатидан олдин овоз бериш, 1 мартдан эса хорижда овоз бериш мумкин эди. Бундан ташқари, Қрим ва Украина шарқидаги эгаллаб олинган ҳудудларда Россия Федерацияси президенти учун сайловлар бўлиб ўтмоқда. Киев вақтинча эгаллаб олинган ҳудудларда яшовчи ёки Россия Федерацияси ҳудудида қолишга мажбур бўлган украиналикларни "сохта сайловларда" қатнашмасликка чақирди.
Сайловда тўрт нафар номзод иштирок этмоқда
Амалдаги президент Владимир Путиндан ташқари, ЛДПРдан Леонид Слуцкий, Россия Федерацияси Коммунистик партиясидан Николай Харитонов ва "Новые люди" партиясидан Владислав Даванков ўз номзодларини илгари сурди.
Россия Федерациясини 24 йил бошқариб келаётган 71 ёшли путин яна олти йилга олий давлат лавозимига қайта сайланиш ниятида.
Москва прокуратураси 17 март куни тушдан кейинги митингларда иштирок этмаслик тўғрисида огоҳлантирди. Асосий сайлов куни тушдан кейин сайлов участкаларида "мувофиқлаштирилмаган ҳаракатлар"да иштирок этиш жиноий қонунбузарлик сифатида баҳоланади, дейилади департаментда.
