Электр энергияни талон-тарож қилган майнинг ферма аниқланди
Ноқонуний фойдаланиш оқибатида давлатга 34,3 миллиард зарар етказилган.
ДХХ томонидан ўтказилган тезкор тадбирда Сирдарёдаги чорвачиликка ихтисослашган МЧЖ биносида криптовалюта ишлаб чиқариш билан шуғулланилган майнинг ферма фаолиятига чек қўйилди.
2022 йилнинг апрель ойидан 2024 йилнинг март ойига қадар МЧЖга қарашли электр ҳисоблагичнинг иккиламчи занжирини вақти-вақти билан узиб, ҳақиқатда оқиб ўтаётган қувватни яшириш орқали ҳисоблагич кўрсаткичини сунъий камайтириш йўли билан электр энергиясидан ноқонуний фойдаланилиши натижасида давлат манфаатларига 34 млрд. 367 млн. сўм миқдорида зарар етказилган.
Ферма томонидан 39,3 млн. кВт электр энергияси талон-торож қилинган. Бу вилоятнинг Боёвут, Сардоба, Оқолтин ва Гулистон туманлари аҳолисининг бир ойлик эҳтиёжига тенг.
Ҳозирда МЧЖнинг мансабдор шахсларига нисбатан жиноят иши қўзғатилиб, тергов ҳаракатлари олиб борилмоқда.
