Ўзбекистонда муаммоли кредитлар улуши рекорд даражада ўсди
Республикада муаммоли кредитлар миқдори жорий йил бошидан бери 3,3 триллион сўмга ўсди.
Марказий банк эълон қилган ҳисоботга кўра, апрелда Ўзбекистон банкларидаги жами кредит қўйилмалари миқдори март ойига нисбатан 5,4 триллион сўмга ошиб, 483,6 триллион сўмга етди. Шундан жисмоний шахсларга 156,1 триллион сўм, юридик шахсларга 327,5 триллион сўм кредит ажратилган.
Ўтган ойда ипотека кредитларининг умумий улуши 60,7 триллион сўмни, микроқарзлар 28 триллион сўмни, истеъмол кредитлари 45,4 триллион сўмни ташкил этди. Ҳисобот даврида юридик шахсларга ажратилган кредитларнинг энг юқори улуши саноат (29 фоиз) ҳамда қишлоқ хўжалиги (11 фоиз) соҳаларига тўғри келган.
Апрель ойида жами кредит қўйилмаларидаги муаммоли кредитлар улуши мартдагига нисбатан 1,7 триллион сўмга ошиб, 23,3 триллион сўмни ташкил этди. Бунда “Ўзсаноатқурилишбанк” муаммоли кредитлари бир ойда 674 миллиард сўмга (умумий 3 триллион сўм), “Ипотекабанк”ники 482 миллиард сўмга (3,2 триллион сўм), “Миллий банк”ники 333 миллиард сўмга (4,2 триллион сўм) ошди ва бошқа банклардагига қараганда энг юқори ўсишни қайд этди.
Марказий банк маълумотларига кўра, Ўзбекистонда 2020 йил апрелдаги муаммоли кредитлар миқдори 5,2 триллион сўм бўлган. Кейинги йилларнинг апрель ойларида бу кўрсаткич сезиларли ўсиш тенденциясига ўтган. Хусусан, 2021 йил апрелида муаммоли кредитлар улуши 12,9 триллион сўмга, 2022 йилда 18 триллион сўмга етган. 2023 йил апрель якунида муаммоли кредитлар миқдори 14,8 триллион сўм бўлган. Яъни бир йил давомида қайтарилмаган кредитлар улуши 3,2 триллион сўмга камайган. Бироқ 2024 йил апрелида муаммоли кредитлар миқдоридаги ўсиш рекорд даражани қайд этган ва бир йилда 8,5 триллион сўмдан ортиқ ўсган.
