Аргентина термасининг финалдаги рақиби маълум бўлди
Баҳс 15 июль куни бўлиб ўтади.
Футбол бўйича Америка Кубогининг ярим финалида Колумбия ва Уругвай терма жамоалари ўзаро баҳс олиб борди. Ўйин Шарлоттадаги (АҚШ) Bank of America стадионида бўлиб ўтди. Учрашув 1:0 ҳисобида колумбияликларнинг ғалабаси билан якунланди.
Ушбу учрашувдаги ягона гол 39-дақиқада ҳужумчи Хефферсон Лерма томонидан киритилди. Унга ҳужумкор ярим ҳимоячи Хамес Родригес ёрдам берди. Биринчи бўлимга қўшиб берилган вақтда Колумбия терма жамоаси ҳимоячиси Даниел Мунос иккинчи сариқ карточкани олиб майдондан четлатилди.
Шу тариқа Колумбия 2024 йилги Америка Кубоги финалига чиқди ва у ерда Аргентина терма жамоасига қарши майдонга тушади. Эслатиб ўтамиз, Аргентина терма жамоаси Америка кубогининг амалдаги ғолиби ҳисобланади. Турнирнинг финал учрашуви 15 июлга белгиланган.
