Саудияда яна бир кучли клуб пайдо бўлмоқда

 

Саудия лигасида яна бир улкан лойиҳа пайдо бўлди. Ўтган ёзда маҳаллий клублар хорижлик юлдуз футболчиларни харид қилиш учун катта маблағ сарфлашган. Қоидага кўра, бу футболчилар "Ал-Ҳилол", "Ал-Наср", "Ал-Иттиҳод" ва "Ал-Аҳли" клубларига боришган. Аммо, энди лигада жиддий амбицияларга эга янги клуб пайдо бўлди. "Ал-Қoдисия" FIFА билан ҳомийлик шартномасига эга "Аramcо neft" компаниясига тегишли. Раҳбарият лиганинг энг яхши клубларини курашга мажбурлашга умид қилмоқда.

 

2023 йилнинг ёзида "Ливерпул"нинг афсонавий собиқ ҳужумчиси Робби Фаулер клуб бош мураббийи лавозимини эгаллади. Бироқ, у бу лавозимда бор-йўғи 117 кун ишлади. Фаулер ўрнига "Реал"нинг собиқ футболчиси Мишел тайинланди. Испаниялик футболчи етти карра Ла Лига чемпиони, 4 карра мамлакат Суперкубоги соҳиби, икки карра Қирол кубогини қўлга киритган. Бундан ташқари, у икки марта UEFА кубогида ғолиб чиққан. Мишел деярли бутун футболчилик фаолиятини "Реал Мадрид"да ўтказган. Футболчи Испания терма жамоаси сафида 66 та ўйин ўтказиб, 21 та гол урган. Мишел мураббийлик фаолиятини 2005 йилда бошлаган. Аввалига Испания клубларида ишлаган, кейин эса хорижга кетган. Саудия Арабистонига сафари олдидан Мишел Греция клубида фаолият олиб борган. Испаниялик мураббий қўл остида "Ал-Қодисия" 26 учрашув ўтказди (16 ғалаба, беш дуранг, беш мағлубият). Лекин, асосийси клуб Саудия футболининг элит дивизионига қайтди. Энди раҳбарият жамоа олдига олий лигадаги ўрнини сақлаб қолишдан кўра жиддийроқ мақсадларни қўймоқда.

 

Бу ёзда "Ал-Қодисия" 59 миллион еврога янги футболчиларни сотиб олди. Клуб мексикалик ҳужумчи Жулиан Кинонес учун 13,8 миллион евро ва "Хетафе"дан марказий ҳимоячи Гастон Алварес учун 12 миллион евро тўлаган. "Марсел" эса ҳужумчи Пер-Эмерик Обамеянг учун 9 миллион евро олди. Обамеянг Европанинг етакчи чемпионатларида ўйнашда катта тажрибага эга. "Ал-Қодисия"нинг яна бир муҳим хариди бу "Реал"нинг собиқ сардори Начо Фернандес. У 6 марта Чемпионлар лигаси, 4 марта Испания чемпиони, 2024 йилда эса Европа чемпионатида олтин медални қўлга киритди. Бундай бой тажрибага эга 34 ёшли футболчининг "Реал" билан шартномаси якунлангани сабабли Саудия клубига текинга берилди. Бундан ташқари, уругвайлик ярим ҳимоячи Наитан Нандезнинг трансферини ҳам қайд этиш лозим. Ярим ҳимоячи бундан аввал "Каляри"да ўйнаган.