"Мавсум бошланди": Тошкентдаги ижара нархлари ошди
Жорий йилнинг август ойида пойтахтда ўртача таъмирланган хонадонлар учун ижара нархлари июль ойига нисбатан ўртача 1,9 фоизга, тўлиқ таъмирланган хонадонлар учун эса 0,3 фоизга ошди.
Бу ҳақида Макроиқтисодий ва ҳудудий тадқиқотлар институти матбуот хизмати мутахассислар таҳлилларини эълон қилди.
Уй-жой ижарасининг ошишига бир нечта омиллар, жумладан, сентябрь ойидан олий таълим муассасаларида янги ўқув йилининг бошланиши бўйича кутилмалар таъсир кўрсатди.
Ўртача таъмирланган уй-жой ижарасига талабнинг ошиши бўйича кутилмалар ушбу турдаги уйлар ижара нархларига таъсир кўрсатди. 2024 йилнинг август ойида ижара нархлари июль ойига нисбатан ўртача таъмирланган 1 хонали уйлар учун 1,3 фоизга, 2 хонали уйлар учун 2,1 фоизга, 3 хонали уйлар учун 1,7 фоизга, 4 хонали уйлар учун эса 2,5 фоизга ошди.
Ўртача таъмирланган хонадонлар учун нисбатан арзон ижара нархлари Сергели (1 хонали — 285 АҚШ доллари, 2 хонали – 348 АҚШ доллари, 3 хонали – 387 АҚШ доллари, 4 хонали — 460 АҚШ доллари), Олмазор (1 хонали – 301 АҚШ доллари, 2 хонали – 359 АҚШ доллари, 3 хонали – 414 АҚШ доллари, 4 хонали – 471 АҚШ доллари) туманларида таклиф этилган бўлса, энг қиммат ижара нархлари Миробод (1 хонали – 350 АҚШ доллари, 2 хонали – 445 АҚШ доллари, 3 хонали – 550 АҚШ доллари, 4 хонали – 736 АҚШ доллари) ва Яккасарой (1 хонали – 349 АҚШ доллари, 2 хонали – 455 АҚШ доллари, 3 хонали – 585 АҚШ доллари, 4 хонали – 603 АҚШ доллари) туманларида кузатилди.
Тўлиқ таъмирланган уй-жойлар ижараси. 2024 йилнинг август ойида тўлиқ таъмирланган 3 хонали ва 4 хонали уй-жойлар учун таклиф этилган ўртача ижара нархлари июль ойига нисбатан пасайган бўлса, 1 хонали ва 2 хонали уй-жойлар учун таклиф этилган ўртача ижара нархларида ўсиш кузатилди. Мазкур даврда 3 хонали уй-жойлар ижараси 0,4 фоизга, 4 хонали уй-жойлар ижараси 2,0 фоизга арзонлашган бўлсада, 2 хонали уй-жойлар ижараси ўртача 0,1 фоизга, 1 хонали уй-жойлар ижараси 3,4 фоизга қимматлашди.
Тўлиқ таъмирланган уй-жойларнинг энг арзон ижара нархлари Сергели (1 хонали – 335 АҚШ доллари, 2 хонали – 416 АҚШ доллари, 3 хонали – 501 АҚШ доллари, 4 хонали – 634 АҚШ доллари) ва Учтепа (1 хонали – 377 АҚШ доллари, 2 хонали – 437 АҚШ доллари, 3 хонали – 563 АҚШ доллари, 4 хонали – 669 АҚШ доллари) туманларида, энг қиммат ижара нархлари эса Миробод (1 хонали – 456 АҚШ доллари, 2 хонали – 688 АҚШ доллари, 3 хонали – 1006 АҚШ доллари, 4 хонали – 1274 АҚШ доллари) ва Шайхонтоҳур (1 хонали – 421 АҚШ доллари, 2 хонали – 715 АҚШ доллари, 3 хонали – 1014 АҚШ доллари, 4 хонали – 1279 АҚШ доллари) туманларида кузатилди.
