Ўзбекистон олтин-валюта захиралари 41 миллиард доллардан ошди
Марказий банк захиралари кетма-кет уч ойдан бери ўсмоқда.
Ўзбекистоннинг расмий захира активлари сентябрь ойида 1,98 миллиард долларга ошиб, 41,139 миллиард долларга етди. Бу ҳақида Марказий банк томонидан эълон қилинган маълумотларда сўз боради.
Марказий банк захиралари кетма-кет уч ойдан бери ўсмоқда — июлда 1,06 миллиард долларга, августда 1,75 миллиард долларга, сентябрда эса 1,98 миллиард долларга ошган. Бу 2013 йилдан бери юритиладиган статистик маълумотларнинг бутун даври учун навбатдаги рекорд кўрсаткич ҳисобланади.
Шунингдек, ўтган ойда хорижий валюта захиралари 518,3 миллион долларга ошган — 8,19 миллиарддан 8,709 миллиард долларгача. Захиралардаги олтиннинг физик ҳажми ўзгаришсиз қолмоқда — 12 миллион троя унцияси (367 тонна). Олтин захиралари қиймати 1,46 миллиард долларга ошиб, 30,4 миллиард доллардан рекорд даражадаги 31,86 миллиард долларга етган.
Эслатиб ўтамиз, Ню-Йорк Comex биржаси маълумотларига кўра, олтин нархи 12 сентябрm кунги савдолар чоғида ўзининг тарихий рекордини янгилаган ва троя унцияси учун 2,58 минг доллардан ошганди. 1 сентябр ҳолатига Ўзбекистоннинг олтин-валюта захиралари 1,75 млрд долларга ошиб, 39,15 млрд долларга етган эди. Бу ошиш асосан олтин ҳисобига рўй берган эди.
