“Эл-класико”дан ташқаридаги кураш
Бугун Испанияда турнинг марказий учрашуви бўлиб ўтади.
"Барселона" ва "Реал Мадрид" топ футболчилар учун ажойиб жой ҳисобланади. Жамоалар ўз рўйхатига энг кучли футболчиларни йиғишади. Табиийки, истеъдод учун курашда жамоалар кўпинча бир-бири билан тўқнаш келишади. Бугун "Барселона" ва "Реал" қайси футболчилар учун курашганини эслаб ўтамиз.
Неймар
Неймар "Барселона"да Лионел Месси ва Луис Суарес билан бирга афсонавий трионинг ажралмас бўлаги ҳисобланади. "Реал Мадрид" Неймарни 12 ёшидан бошлаб кузатган. 2006 йилда бразилиялик футболчи ҳатто клуб базасига ҳам келган ва жамоа юлдузлари билан суратга тушган. Бироқ, бразилияликнинг отаси ўшанда ёш футболчининг Испанияга кўчиб ўтишини ҳали эрта деб ҳисоблаган. Мазкур ҳикоя 2011 йилда давом этди. "Реал Мадрид" аллақачон Неймар билан шартнома шартларини келишиб олади. 2017 йилда Флорентино Перес "Онда Серо" радиосига берган интервьюсида бразилиялик ҳужумчи ҳатто тиббий кўрикдан ўтганини айтганди. Бироқ, Неймар кутилмаганда "Сантос" билан 2014 йилгача шартнома имзолайди. Кейин эса курашга "Барселона" қўшилади. Шундан сўнг каталонияликлар Неймар билан яширин келишувга эришади. У 2014 йилда 10 миллион евро + 30 миллион евро эвазига "Барса"га ўтишга ваъда беради. 2012 йилда мадридликлар футболчини қўлга киритишга яна бир бор уриниб кўрди. "Реал" кўпроқ пул таклиф қилди. Аммо якунда бразилиялик футболчи Каталония клуби аъзосига айланди.
Эндрик
Европадаги топ-клубларнинг ярми вундеркиндни қўлга киритиш учун кураш олиб борди. Аммо охир-оқибат футболчи Мадрид жамоасига кўчиб ўтди. "Реал Мадрид" Неймар "Барселона"га ўтганидан кейин Виниcиус ва Эндрик каби иқтидорли футболчиларни бошқа ҳеч қачон ўтказиб юбормасликка қарор қилди. Балки, бу "Челси" учун ҳам сабоқ бўлиши мумкин, чунки дастлаб лондонликлар Эндрикни сотиб олишга яқинроқ бўлишган, аммо Лондон жамоаси футболчининг нархидан норози эди. Кейинчалик "Реал" футболчи учун белгиланган пулни тўлашга рози бўлган. Бироқ, бир неча йил олдин ёш форвард "Барселона"нинг қизиқишлари доирасида эди. Унинг ўзи ҳам жамоага мухлислик қилишини таъкидлаган. Якунда эса бразилиялик футболчи Мадридни танлади.
Виниcиус Жуниор
Виниcиус "Олтин тўп"ни қўлга киритишига бир қадам қолди. Бразилиялик футболчи 2018 йилдан бери "Реал" сафида уч марта Испания чемпионатида ва икки марта Чемпионлар лигасида ғалаба қозонди. Бироқ, "Фламенго" клубидан Испанияга кўчиб ўтишдан олдин у каталонияликлар аъзосига ҳам айланиши мумкин эди. Мадридликлар билан келишувдан аввал вингер вакиллари "Барселона"дан таклиф олганди. Аммо ҳамма нарсани Виниcиуснинг ўзи ҳал қилди.
"Биз "Барселона"дан "Реал"дан кўра қулайроқ таклиф олдик. Аммо Винининг ўзи аллақачон Мадридни танлаган эди, чунки у буни идеал вариант деб ҳисоблади. Бу пулдан кўра муҳимроқ эди: у ўз келажагини танлаши керак эди ва шундай бўлди", - дейишган бразилиялик ҳужумчининг агентлари Фредерико Пена ва Лукас Минеиро.
Луис Суарес
Суарес "Барселона"нинг 20-асрдаги энг яхши футболчиларидан бири. У билан бирга каталонияликлар Чемпионлар лигаси, тўртта Испания чемпионлиги ва яна бир қанча муҳим совринларни қўлга киритишди. Аммо уругвайлик футболчини Мадрид жамоаси ҳам қўлга киритиши мумкин эди. 2024 йилда "Марса" нашрига берган интервьюсида Суарес бу ҳақда батафсил тўхталиб ўтганди:
"ЖЧ-2014 олдидан "Реал" мени ўз сафига қўшиб олмоқчи эди ва ҳаммаси яхши ўтди. Клуб Карим Бенземани "Арсенал"га сотиш ҳақида ўйлаётганди. Ҳаммаси шунга қараб кетаётганди. Лекин, жаҳон чемпионати бошланганда, "Барселона" бу пойгага қўшилди ва "Барселона"ни афзал кўрдим. Сабаби клубда ўйнаш менинг орзуим эди".
Родриго
Родриго "Реал Мадрид"да ажойиб ўйинлар кўрсатмоқда, аммо у "Барселона"да ҳам ўйнаши мумкин эди. 2023 йилда бразилиялик футболчи каталонияликлар билан дастлабки келишувга эришганини айтганди. Аммо Мадрид жамоасининг аралашувидан сўнг бу фикридан қайтди:
"Болалигимда иккита футболкам бор эди: бири "Барса", иккинчиси "Реал"ники. Бироқ, бу танлов мен учун жуда осон эди. Ўшанда мен "Барселона" билан шартнома бўйича келишиб олгандим, "Реал" ҳам мен учун кураш олиб боришини кутмагандим. Бу вазиятда қарор қабул қилиш қийин эди, лекин кейин бу ҳаётимдаги энг бахтли лаҳзалардан бири эканлигини англадим”.
Лука Модрич
2008 йилда Модричга "Барселона" жиддий қизиқиш билдирди. Испаниянинг "Мундо Депортиво" газетаси Загребнинг "Динамо" клуби ярим ҳимоячисига каталонияликларнинг футболкасини совға қилади ва Лука у билан суратга тушади. Лекин, якунда Модрич Испанияда эмас, АПЛга йўл олади. Икки йил ўтгач, оммавий ахборот воситалари Луканинг Каталонияга эҳтимолий трансферини яна муҳокама қилишни бошлади. Кейин унинг ўзи барча миш-мишларга нуқта қўйди:
"Албатта, сизнинг номингиз шундай клуб билан боғлангани ёқимли. Аввалига улар мени "Интер", “Манчестер Юнайтед” ва "Челси"га "сотишди", энди эса "Барселона"га. Аммо мен яқинда "Тоттенҳем" билан шартнома имзоладим. Мен мухлисларимизни яхши кўраман ва ўзимни уйимдагидек ҳис қиламан. Бу ерда барча орзулар амалга ошиши мумкин”.
Натижада, Модрич 2012 йилда "Реал"га ўтди ва Мадриднинг афсоналаридан бирига айланди.
Девид Алаба
2021 йилда Алаба "Бавария"ни эркин агент сифатида тарк этди ва «Реал»га ўтди. Шундан бир йил олдин Девид фаолиятини қаерда давом эттириш имкониятларини ўрганаётган эди. "Барселона" устувор вазифалардан бирига айланганди. "Спорт.эс" нашрининг хабар беришича, австриялик футболчи каталонияликларга умид боғлаган. Давид "Барса" унинг молиявий эҳтиёжларини қондира олишига ишонган. Клуб ҳам Алаба билан шартнома имзолашни режалаштирган. Аммо якунда "Барселона" молиявий курашда "Реал"га ютқазади.
