Бразилиялик юлдуз "Реал"ни тарк этишга қарор қилди
У бошқа жамоага ўтишни истаяпти.
Ёзда Бразилиядан келиб, "Реал"га қўшилган 18 ёшли Эндрик Мадридни тарк этишга тайёрлигини билдирди. Европага катта умидлар билан келган ёш юлдуз "Реал"да етарли даражада ўйин амалиётига эга бўлмаяпти. Бош мураббий Карло Анчелотти асосан тажрибали ўйинчиларга ишонч билдиряпти.
Эндрик бу аҳвол бўйича ўз эътирозини айтди ва клуб билан 2030 йилгача тузилган шартномаси борлигига қарамай, бошқа жамоага ўтишни истаяпти.
Маълум қилинишича, Эндрикка харидорлар ҳам тайёр. Сўнгги пайтда "Саутгемптон", "Тоттенҳем" ва "Ювентус" каби клублар ёш иқтидорга имкон бермоқчи. Трансферлар бўйича экспертларнинг таъкидлашича, "Реал" бразилиялик ўйинчини тўлиқ сотиб юбормайди. Бироқ мадридликлар унинг тажриба тўплаши ва мунтазам ўйин амалиётига эга бўлиши учун ижарага жўнатиши мумкин.
