Муҳаммад Салоҳ фаолиятини қаерда давом эттириши мумкин?
Футболчининг агенти янги келишувга эришган.
"Ливерпул" ҳужумчиси Муҳаммад Салоҳнинг амалдаги шартномаси мавсум охирида якунига етади. Томонлар ҳамкорликни давом эттириш бўйича бир неча ойдан бери музокара ўтказиб келаётган эди. Бироқ яқинда мисрлик футболчи клубдан кетиши мумкинлиги ва бу жамоа унга ҳали шартнома таклиф қилмагани билан боғлиқ эканини айтганди.
Бир неча манбаларнинг маълум қилишича, Салоҳнинг агенти Рами Аббос клуб мутасаддилари билан янги шартнома бўйича келишувга эришган. Музокараларнинг чўзилиб кетиши моддий масалаларга боғлиқ бўлмаган. Ҳамкорликнинг узайтирилишига шартнома муддати тўсқинлик қилган. "Ливерпул" ҳужумчига бир йиллик битим бермоқчи бўлган. Салоҳ шартномани уч йилга тузишни талаб қилган.
Охир-оқибат томонлар ўзаро келишувни 2027 йилнинг 30 июнигача давом эттиришга кўнган. Тез орада Муҳаммад Салоҳ янги шартномага имзо чекади.
