Асад оиласининг бойлиги қанча?
The Wall Street Journal нашри бу ҳақидаги маълумотларни очиқлади.
Нашрга кўра, Сурияда Башар Асад режимининг қулаши билан унинг кўп йиллик бошқаруви давомида орттирган миллиардларига глобал ов бошланди.
"Инқилобдан олдин Асад оиласининг пулларини ювиш учун жуда кўп вақтлари бўлган, уларда ҳар доим "Б" режаси мавжуд эди, оила қочишдан олдин яхши шароитларга эга бўлди", — деди нашрнинг суҳбатдоши Эндрю Таблер (Таблер Оқ уй собиқ ходими, у Асаднинг активларини аниқлаш ва уларга нисбатан санкциялар қўллаш билан шуғулланган).
Асад бойлигининг ҳажми аниқ эмас, оила аъзоларининг қай бири бу активларни назорат қилиши ҳам номаълум. Башар Асаднинг қариндошлари томонидан йиллар давомида амалга оширилган халқаро харидлар орасида Россиядаги ҳашаматли кўчмас мулклар, Венадаги бутик меҳмонхоналар ва Дубайдаги шахсий самолёт бор. АҚШ Давлат департаментининг 2022 йил учун ҳисоботида Асадлар билан боғлиқ корхоналар ва активларнинг қиймати 12 миллиард долларга етиши мумкинлиги қайд этилган.
Бу даромад асосан давлат монополиялари ва гиёҳванд моддалар савдоси орқали орттирилган.
