Жамоа излаётган Погба, ёрдамга муҳтож Пеп ва аросатдаги Решфорд
Қишки трансфер ойнасида қандай янгиликлар кутилмоқда?
Тез орада Европада қишки трансфер ойнаси очилади. Айни кунларда барча оммавий ахборот воситалари потенциал битимлар ҳақида ёзишмоқда. Январь ойида топ клубларда қандай ўзгаришлар юз бериши мумкин? Қуйида шу ҳақида тўхталиб ўтамиз.
"Манчестер Юнайтед" Решфорд билан хайрлашади
Маркус Решфорднинг "Манчестер Юнайтед" бош мураббийи Рубен Аморим билан муносати яхши эмас. Шу сабабдан Аморим Маркусни таркибдан олиб ташлади ва у билан хайрлашишга тайёр. "Тhe Guardian" нашрининг хабарига кўра, клуб Решфордни трансферга қўйган. Раҳбарият январь ойида Маркусни сотиш ҳақида бош қотирмоқда. Бир қатор нашрлар Саудия Арабистон жамоалари Рашфордга қизиқиш билдираётганини таъкидлаган. Аммо, Маркуснинг ҳозирча Европани тарк этиш нияти йўқ.
Погба қаерга боради?
Пол Погба "Ювентус"ни тарк этди. 2025 йилнинг март ойида француз футболчиси дисквалификация муддати тугаганидан кейин майдонга қайтиш имкониятига эга бўлади. Бразилиянинг "Bolavip" нашри хабарига кўра, Погба "Коринтианс" клубига ўтишга розилик берган. Аммо, айрим хабарларга кўра, футболчи "Марсел"га ўтиш ҳақида ўйламоқда. Погбанинг фикрича, бу унинг Франция терма жамоасига қайтиш имкониятини оширади.
Пеп ёрдам олади
"ESPN" нашри хабарига кўра, январь ойида "Манчестер Сити" биронта ярим ҳимоячи сотиб олади. “Манчестер Сити”нинг иккита асосий варианти бор. Булар Мартин Субименди (“Реал Соседад”) ва Бруно Гимарас ("Нюкасл"). Жамоа марказий ҳимоячи, ҳужумчи ва ўнг қанот ҳимоячиси сотиб олиш вариантини ҳам кўриб чиқмоқда.
"Ювентус" йирик харидни амалга оширади
"Ювентус" мавсумни яхши ўтказмоқда. Тяго Мотта шогирдлари чемпионатда пешқадам "Аталанта"дан 9 очко ортда қолишмоқда. Чемпионлик учун курашда клубга янги харидлар керак бўлади. "La Gazzetta dello Sport" хабарига кўра, "Ювентус" Жакомо Распадори билан шартнома имзоламоқчи. Туринликлар "Наполи" ҳужумчисини анчадан бери кузатиб келишади. Мотта ҳам футболчининг ўйинига юқори баҳо берган.
"Ливерпул"га қанот футболчиси керак
Трент Александр-Арнолд "Ливерпул" билан 2025 йилнинг ёзида тугайдиган шартномасини узайтирмайди. Музокаралар қийин кечмоқда, ҳимоячига "Реал" қизиқмоқда. Трентнинг ўзи клубни тарк этишни хоҳламоқда. Шу сабабдан "Ливерпул" унга ўринбосар тайёрламоқда. "Bild" нашрига кўра, мерсисайдликлар "Байер" ҳимоячиси Жереми Фримпонгнинг агенти билан боғланишган.
Артета ҳужумчи излаяпти
"Арсенал" кучли тўққизлик футболчиси йўқлиги сабаб қийналмоқда. Кай Хавертс ажойиб футболчи, аммо барибир марказ ҳужумчиси эмас. "Арсенал" раҳбарлари ушбу позицияга номзодларни кўриб чиқмоқда. Хабарларга кўра, лондонликлар Душан Влаҳовични 2025 йилнинг январидаёқ сотиб олиш имкониятини кўриб чиқмоқда. 24 ёшли футболчининг трансфер қиймати 60 миллион евро ҳисобланади.
Осимҳен Премьер-лигага келадими?
Бир қатор нашрлар тарқатган хабарга кўра, "Манчестер Юнайтед" январь ойида Виктор Осимҳенни сотиб олиши мумкин. Қайд этилишича, манкунианликлар футболчининг трансфери ҳақида ўйлашмоқда.
