Қирғизистон янги давлат мадҳиясини танламоқда
Бу бўйича республикада танлов эълон қилинган.
Ҳукумат ҳозирги мадҳияни эскирган, ижро этиш қийин ва замонавий руҳга мос эмас деб ҳисобламоқда.
Маданият, ахборот, спорт ва ёшлар сиёсати вазирлиги мадҳиянинг янги матни ва мусиқаси учун танлов эълон қилди. Янги мадҳиянинг мамлакатнинг тарихий мероси, маданий анъаналари ва миллий бирдамлигини яхшироқ акс эттириши мақсад қилинган.
Лойиҳалар тантанаворлик, ватанпарварлик, осон қабул қилиниши ва қирғиз адабий тили меъёрларига мослиги каби мезонлар асосида баҳоланади.
Танловни парламент депутатлари, расмийлар, ёзувчилар, бастакорлар ва маданият арбобларидан иборат комиссия кўриб чиқади. Агар муносиб вариантлар топилмаса, танлов бекор қилиниши мумкин.
Мадҳияни ўзгартириш ғояси 2024 йил октябрь ойида пайдо бўлди. Ўшанда парламент спикери Нурланбек Тургунбек янги байроқ қабул қилингани сабабли мамлакатга янги мадҳияга ҳам эҳтиёж борлигини билдирган эди. Президент Садир Жапаров ташаббусни қўллаб-қувватлаб, бунинг ҳеч қандай муаммоси йўқлигини таъкидлади.
