Австралия йўлларида ноёб йўл белгилари синовдан ўтказилмоқда
Кечаси порлайдиган ушбу белгилар сабаб ҳалокатлар камайиши кутилмоқда.
Австралиянинг Виктория штатида йўл ҳаракати хавфсизлигини ошириш мақсадида илғор технологиялар асосида ишлаб чиқилган янги турдаги йўл белгилари синовдан ўтказилмоқда. Улар фотолюминестсент қоплама билан қопланган бўлиб, кечаси ёки паст нурли шароитларда ўз-ўзидан порлайди.
Ушбу инновацион ёндашув мамлакат миқёсидаги кенг кўламли хавфсизлик дастурининг бир қисми ҳисобланади. Расмийлар бу лойиҳа учун 245 миллион Австралия доллари ажратган. Шундан тўрт миллиони янги рефлекторлар, ЛEД ёритгичли пиёдалар йўлаклари ва тактил плиткаларни жорий этишга сарфланмоқда.
Эътиборлиси шундаки, мавжуд белгиларни тўлиқ алмаштириш шарт эмас – улар устидан махсус люминестсент қоплама суртилмоқда. Бу эса харажатларни камайтириш билан бирга, атроф-муҳитга зарар етказмасликни ҳам таъминлайди.
Синов ҳудудларида олинган суратлар ушбу белгилар қоронғуда қандай ёрқин порлашини яққол намоён этмоқда. Мутахассислар фикрича, бу технология ҳайдовчилар учун йўлларни янада аниқроқ кўриш имконини беради ва тунги авариялар сонини камайтиради.
