Доллар сўнгги 3 йилликдаги энг паст даражага тушди
Олтин эса янги рекордларни ўрнатмоқда.
Жаҳон молия бозорларида долларнинг заифлашуви фонида олтин нархи рекорд даражада кўтарилди.
Спот олтин нархи 1,7 фоизга ошиб, бир унция учун 3384 долларни ташкил этди. Бу олтин учун бутун тарих давомида энг юқори нарх ҳисобланади. Долларнинг глобал валюталар савдосидаги индекси эса сўнгги уч йилдаги энг паст даражага тушиб кетди, бу эса олтиннинг қийматини янада оширди.
Таҳлилчиларнинг фикрича, АҚШ ва Хитой ўртасидаги савдо тарангликлари, шунингдек, глобал иқтисодиётда стагфляция (ўсиш сусайиши билан бирга инфляция) хавфи олтин нархининг кўтарилишига асосий омил бўлмоқда.
АҚШ президенти Доналд Трамп 2 апрель куни ўнлаб мамлакатларга “ўзаро тарифлар” жорий этилишини эълон қилганди. Гарчи айрим давлатларга нисбатан имтиёзлар берилган бўлсада, Хитой билан савдо қарама-қаршилиги кучайиб бормоқда. Хитой ўзининг иқтисодий манфаатларини ҳимоя қилишини билдирган ва бошқа давлатларни АҚШ билан бир томонлама битимлардан қайтарган.
Трамп, шунингдек, Федерал захира тизими раиси Жером Пауэллни танқид остига олиб, унинг лавозимда қолиш-қолмаслигини кўриб чиқаётганини билдирган.
