Глобал исиш орол давлатларига хавф солмоқда
Тинч океанидаги ороллар йўқ бўлиб кетиш арафасида.
Глобал исиш натижасида денгиз сатҳининг кўтарилиши Тинч океанидаги кичик орол давлатлар учун ҳаёт-мамот масаласига айланмоқда. Бутунжаҳон метеорология ташкилоти (ВМО)нинг янги ҳисоботига кўра, 2024 йилда Тинч океанининг жануби-ғарбий қисмида рекорд даражадаги ҳарорат қайд этилган. Бу эса минтақада сув сатҳининг тез кўтарилишига олиб келмоқда.
Ҳисоботда ҳар йили камида 50 мингга яқин инсон иқлим ўзгариши туфайли ўз уйларини тарк этиш хавфи остида қолаётгани таъкидланган. Оролларда яшовчи аҳолининг ярми қирғоқдан атиги 500 метр масофада ҳаёт кечиради — бу эса уларни кучли тўлқинлар, сув тошқинлари ва ер ости сувларининг кўтарилиши каби хавфларга нисбатан янада ҳимоясиз қилади.
Маҳаллий аҳоли хавфли ҳудудларда қолиш ёки хавфсизроқ ҳудудларга кўчиб ўтиш ҳақида қийин қарорлар қабул қилишга мажбур.
