Болтиқ денгизида “учувчи кемалар” пайдо бўлди
Бу ҳодиса оптик иллюзия экани айтилмоқда.
Калининград вилояти қирғоқларида жойлашган Болтиқ денгизида одамлар сув устида "учаётгандек" кўринган кемаларни кўришган. Ушбу ғайриоддий манзара "Маш" Телеграм каналида эълон қилинган фотосуратлар орқали тарқалди.
Кемалар сув юзасида эмас, худди ҳавода ҳаракатланаётгандек кўрингани кўпчиликни ҳайратга солди. Бироқ мутахассисларнинг айтишича, бу ҳодиса аслида оптик иллюзия — яъни кўз алдовидир.
Бундай иллюзия совуқ ва илиқ ҳаво қатламлари тўқнашганда ёруғликнинг синиши натижасида юзага келади. Бу ҳолат узоқда жойлашган объектларнинг жойлашувини нотўғри кўрсатади.
Натижада, кемалар сувдан узилган, гўёки ҳавода сузаётган ҳолатда кўринади. Бу табиий, аммо ноёб ҳодиса қирғоқдагиларнинг эътиборини тортган.
