Фарғонада маҳалла раиси мажлисда вафот этгани айтилди
Ҳолат юзасидан туман ҳокимлиги расмий изоҳ берди.
Ижтимоий тармоқларда Фарғона вилоятининг Фурқат туманида маҳалла раиси ҳокимликда солиқ тушуми бўйича ўтказилган расмий йиғилиш пайтида ҳақорат қилингани ва вафот этгани ҳақида хабар тарқалмоқда. Ҳолат юзасидан туман ҳокимлиги расмий муносабат билдирди.
Қайд этилишича, жорий йил 18 июнь куни туман ҳокимлигида ўтказилган йиғилишда маҳалла фуқаролар йиғинлари раислари иштирок этган бўлиб, унда уларга зиммасига юклатилган вазифалар ижроси юзасидан топшириқлар берилган. Йиғилиш танкидий руҳда ўтган, лекин туман ҳокими томонидан шахсга нисбатан ҳақоратли сўз ишлатилмаган.
Калдушон маҳалласи раиси Шарифжон Абдуллаев йиғилиш пайтида соғлиги билан боғлиқ муаммолар сабабли фаолиятини тўхтатмоқчилиги айтиб, йиғилишни тарк этган. Ҳокимлик ташқи ҳовлисида соғлиги ёмонлашганлиги сабабли тез ёрдам чақирилган, туман тиббиёт бирлашмасига олиб борилган. Афсуски, шифокорларнинг саъй-ҳаракатларига қарамасдан, вафот этган.
“Фурқат тумани ҳокимлиги барча оммавий ахборот воситалари ва ижтимоий тармоқ фойдаланувчиларини холисликка, ишончли ва расмий маълумотларга таянишга, текширилмаган маълумотлар орқали жамоатчилик фикрига салбий таъсир ўтказмасликка чақириб қолади”, дейилади хабарда.
