Кам таъминланган оила фарзандлари учун пуллик тўгаракларга имтиёзлар берилади

 

Ўзбекистонда кам таъминланган оилалар фарзандлари учун қўшимча таълим олиш имкониятлари кенгайтирилмоқда. Эндиликда IT, чет тили, касб-ҳунар ва бошқа йўналишлардаги пуллик тўгаракларга қатнашаётган болалар харажатларининг 80 фоизигача давлат томонидан қоплаб берилади.

 

Бу тартиб Вазирлар Маҳкамасининг 14 июндаги қарори билан тасдиқланди. Қарорга мувофиқ, маблағлар 2025 йил март ойидан бошлаб ажратилиши белгиланган бўлиб, дастлабки босқичда давлат буджетидан 200 миллиард сўм ажратилади.

 

Унга кўра:

• 14 та туман, 549 та маҳалла, 6322 нафар ўқувчи қамраб олинади.
• Тўгараклар хусусий сектор билан ҳамкорликда ташкил этилади.
• Ўқувчилар IT, хорижий тиллар, олий таълимга тайёрлов, касбий йўналишлар ва умумтаълим фанлари бўйича машғулотларга қатнашади.
• 7–11 ёшли ўқувчиларга тўгараклар фақат давлат мактаблари томонидан тақдим этилади.

 

Имтиёздан фойдаланиш тартиби:

• Ота-оналар махсус электрон платформа орқали тўгаракни танлайди, шартнома тузади ва харажатларнинг 80 фоизигача компенсация олади.
• Ўқувчи бир вақтнинг ўзида 2 тагача тўгаракка, 9 ойгача бўлган муддатга қатнашиши мумкин.
• Имтиёздан мактабни тамомлагунча 2 марта фойдаланиш мумкин.
• Тўгаракни муваффақиятли тугатганлик ҳақида сертификат олиш талаб этилади.
• Давомат қатъий назорат қилинади, биометрик ёки геолокацияли электрон тизим орқали ҳар дарсда белгилаб борилади.

 

Тўлов чегаралари:

• 1 БҲМ (375 минг сўм) – 7−11 ёшли болалар учун узайтирилган гуруҳ;
• 2 БҲМ (750 минг сўм) – 12−18 ёшли ўқувчилар учун фан ва тил тўгараклари;
• 4 БҲМ (1,5 млн сўм) – 15−18 ёшли ўқувчилар учун IT ва касбий тўгараклар.

 

Эътиборга олиш керак бўлган ҳолатлар:

• YAIDXP маълумотлари тасдиқланмаган бўлса;
• Давомат бошқа жойда қайд этилса;
• Электрон платформага бошқа боланинг сурати юкланса — компенсация бекор қилинади.

 

Электрон платформа 2025 йил 1 сентябргача ишга тушади. Уни UZINFOCOM, Рақамли технологиялар вазирлиги ва Мактабгача ҳамда мактаб таълими вазирлиги биргаликда ишлаб чиқади. 15 сентябргача эса YAIDXP орқали мурожаатларни кузатиш тизими жорий қилинади.

 

MMTV эса ўқувчиларнинг натижаларига асосланиб, ҳар йили тўгаракларни рейтинг асосида баҳолайди ва натижаларни платформада эълон қилади.