Европа Иттифоқи Россияга қарши санкцияларни узайтиради: Алишер Усмонов рўйхатдан чиқарилади
Қарор Латвия аввалги эътирозидан воз кечиб, овоз беришда бетараф қолганидан сўнг маъқулланган.
Европа Иттифоқи давлатлари Россияга қарши амалдаги санкцияларни уч йилга узайтиришга келишди. Шу билан бирга, россиялик миллиардерлар Алишер Усмонов ва Михаил Фридман санкциялар рўйхатидан чиқарилади.
Бу қарорга Латвия аввалги эътирозидан воз кечиб, овоз беришда бетараф қолганидан сўнг келинган. Европа Иттифоқида санкцияларни жорий этиш ёки узайтириш учун барча аъзо давлатларнинг розилиги талаб қилинади.
Аввал Россияга қарши санкциялар ҳар олти ойда қайта кўриб чиқилар эди. Янги келишувга кўра, рўйхатдаги қолган қарийб 3 минг нафар жисмоний ва юридик шахсга нисбатан чекловлар уч йилга узайтирилади.
Қарор «ёзма тартиб» деб аталадиган жараён якунлангач, расман қабул қилинади.
Сентябрь бошида Франция Усмоновни Европа Иттифоқи санкциялар рўйхатидан чиқаришни таклиф қилган. Париж бунга миллий хавфсизлик билан боғлиқ хавотирларни сабаб сифатида кўрсатган.
Кейинчалик Люксембург ҳам Фридманга нисбатан худди шундай чорани қўллашни талаб қилган. Фридман Люксембургга қарши 16 миллиард долларлик даъво киритган.
