Имтиҳон саналари яқинлашмоқда, нодавлат ОТМлар учун қабул тартиби ўзгаради

 

Билим ва малакаларни баҳолаш агентлиги вакили Жамшид Одилов Ҳукумат қарори лойиҳаси ҳақида маълумот берди.

 

Унинг сўзларига кўра, бу йилги ОТМларга кириш тест синовлари 14–25 июль оралиғида ўтказилиши мумкин. Имтиҳон бинолари рўйхати шакллантирилган, аммо аниқ саналар ариза топшириш жараёни якунлангач эълон қилинади.

 

Шу билан бирга, олий таълим соҳасида нодавлат секторни янада ривожлантириш бўйича янги таклифлар илгари сурилмоқда. Ҳукуматнинг “Республикада нодавлат таълим хизматларининг сифатини ошириш чора-тадбирлари тўғрисида”ги қарор лойиҳаси жамоатчилик муҳокамасига қўйилди.

 

Унга кўра, нодавлат олий таълим ташкилотларига талабаларни йилига икки марта — 15 октябргача ва 15 февралгача қабул қилиш ҳуқуқини бериш таклиф этилмоқда.

 

Бунга қўшимча равишда, қуйидаги талаблар белгиланиши мумкин:

• Нодавлат ОТМларда ҳам қабул, ўқишни кўчириш ва давлат аттестацияси жараёнлари давлат ОТМларидаги талаблар асосида амалга оширилади;
• Таълим сифати бўйича назорат ахборот тизими мавжуд бўлиши ва у вазирлик тизимига интеграция қилиниши шарт;
• 5 йил ичида зарур инфратузилмага эга бўлиши лозим.

 

Президент қарорлари асосида ташкил этилган олийгоҳлар эса бу талабдан мустасно ҳисобланади.

 

Шунингдек, HEMIS тизимида рўйхатдан ўтмаган талабаларга давлат намунасидаги дипломлар берилишига йўл қўйилмайди.