Тошкентда фуқаро ИИБ ходимига пичоқ билан таҳдид қилди
Фуқарони жароҳатлаб, қочиб кетаётган гумонланувчини ИИБ ходими ушлаб олган.
Ижтимоий тармоқларда Тошкент шаҳрининг Учтепа туманида фуқаро ички ишлар органлари ходимига қаршилик кўрсатаётганлиги акс этган видео тарқалиб, турли муҳокамаларга сабаб бўлмоқда. Ҳолат юзасидан шаҳар ИИББ ахборот хизмати расмий муносабат билдирди.
Аниқланишича, 21 июнь куни соат 14.30 ларда Учтепа тумани 31-мавзеси ҳудудида икки нафар фуқаро тортишиб қолган ва томонлар ўзаро жанжаллашиб кетган. Жанжал вақтида фуқаро У.M. ўткир тиғли жисм билан фуқаро Н.T. га тан жароҳати етказган ҳамда ҳодиса жойидан яширинган. Натижада жабрланувчи “чап кўкрак қисмининг санчилган-кесилган жароҳати” ташхиси билан шифохонага жойлаштирилган.
Ҳодиса жойига етиб келган ҳудудий профилактика инспектори O.Aбдуллаев мазкур жиноятни содир этган шахсни “иссиқ изи”дан топиб, уни ушлаш чораларини кўрган вақтида У.M. унга ҳам пичоқ билан тажовуз қилиб, фаол қаршилик кўрсатган. Кўрилган чора-тадбирлар натижасида гумонланувчи профилактика инспектори ва ППХ ходимлари томонидан қўлга олинган ҳамда терговга жалб қилинган.
ИИО ходимлари тан жароҳати олмаган.
Мазкур ҳолат юзасидан Учтепа тумани ИИО ФМБ ҳузуридаги Тергов бўлими томонидан Ўзбекистон Республикаси Жиноят кодексининг 105-моддаси 2-қисми «м» банди билан жиноят иши қўзғатилиб, дастлабки тергов ҳаракатлари олиб борилмоқда. Тергов якуни бўйича қонуний қарор қабул қилиниши таъминланади.
