Автомобиль ваъдаси билан бошланган фирибгарлик: юзлаб фуқаролар алданган
25 та МЧЖ орқали миллиардлаб сўмлик пул ўзлаштирилган.
Бир гуруҳ шахслар томонидан ташкил этилган 25 та масъулияти чекланган жамият (МЧЖ) орқали кенг кўламли фирибгарлик фош этилди. Улар фуқаролар билан аванс асосида автомобиль етказиб бериш шартномаларини тузиб, машиналар 120 кун ичида топширилишини ваъда қилган. Аммо ваъдалар бажарилмаган, тушган пуллар эса ўзлаштирилган.
Мазкур ҳолат юзасидан Ўзбекистон Жиноят кодексининг 168-моддаси 4-қисми “а, в” бандлари асосида жиноят иши қўзғатилган. Дастлабки терговда 843 нафар фуқарога жами 50,1 миллиард сўм зарар етказилгани аниқланган.
Тергов доирасида ушбу МЧЖларга тегишли 339 та транспорт воситаси мусодара қилинган. Ҳозирга қадар 9 нафар гумонланувчига нисбатан айблов эълон қилинган бўлиб, уларга “қамоқ” тарзидаги эҳтиёт чораси қўлланган.
Ҳуқуқни муҳофаза қилувчи органлар томонидан иш бўйича суриштирув ишлари давом эттирилмоқда.
