АҚШда икки нафар Ўзбекистон фуқаросига ноқонуний миграция бўйича айблов қўйилди
Улар АҚШга ноқонуний муҳожирлар олиб киришда гумон қилинмоқда.
АҚШда икки нафар Ўзбекистон фуқароси — 30 ёшли Бехзод Раҳматов (Оҳаё штати, Майснвил шаҳри) ва 31 ёшли Мунис Хожиев (Пенсилвания штати, Филаделфия шаҳри) АҚШга ноқонуний муҳожирларни молиявий манфаат эвазига олиб киришда айбланиб, қўлга олинди. Бу ҳақда АҚШлик адвокат Девид Меткалф маълум қилди.
Расмий айблов хулосасига кўра, мазкур шахслар дастлаб танишларидан бирининг мамлакатга ноқонуний кириб келишига кўмаклашган. Кейинчалик улар ушбу фаолиятни кенгайтириб, бошқа хорижий фуқароларни ҳам АҚШга ноқонуний равишда олиб кириш схемаларига жалб қила бошлаган.
Маълумотларга кўра, 2022 йил декабридан 2025 йил майига қадар Раҳматов ва Хожиев Пенсилваниянинг Шарқий округи ва ундан ташқарида фаолият юритиб, турли хорижий фуқароларни Мексика орқали АҚШ чегарасига олиб келиш учун уларга виза ва паспортлар олишда ёрдам кўрсатган. Улар бу хизматлари эвазига муҳожирларнинг ўзлари ёки уларнинг вакилларидан пул ўтказмаларини қабул қилиб олишган.
Айбланувчилар АҚШга ўзлари ҳам қонуний бўлмаган йўл билан кирганликда гумон қилинмоқда. Агар айбловлар тасдиқланса, ҳар бирига 10 йилгача озодликдан маҳрум қилиш жазоси тайинланиши мумкин.
Мазкур иш Федерал қидирув бюроси (ФҚБ) томонидан тергов қилинмоқда. Суд жараёнида айбловларни федерал прокурор ёрдамчилари Дэниел Бейтман ва Эверетт Витерелл илгари суради.
