Жанубий Корея Президенти Шимол билан бирлашишни таклиф қилди

Жанубий Корея янги президенти Ли Же-мёнг ўзининг сиёсий қарашларида Шимолий Корея билан мулоқотни қайта тиклашга катта эътибор қаратмоқда.

 

Унинг таъкидлашича, ҳудудий хавфсизликни мустаҳкамлаш учун дипломатик ёндашув муҳим аҳамиятга эга.

 

Президент инаугурация нутқида Шимолий Корея билан ҳарбий ва дипломатик алоқаларни тиклашга тайёрлигини билдириб, мулоқот урушдан кўра арзонроқ ва оқилона йўл эканини таъкидлади. У ҳарбий қарама-қаршиликлар ўрнига сиёсий музокаралар орқали ечим топишни афзал кўрмоқда.

 

Ли Же-мёнг АҚШ ва Япония билан стратегик ҳамкорликни мустаҳкамлашни ҳам муҳим деб билмоқда. Бу қарор Жанубий Кореянинг хавфсизлик сиёсатини кучайтиришга хизмат қилади. Шунингдек, у Корея яриморолида дипломатик алоқаларни тиклашни ўзининг асосий ташқи сиёсий устувор йўналишларидан бири деб эълон қилди.

 

Унинг ташаббуслари доирасида Жанубий ва Шимолий Корея ўртасидаги ҳарбий алоқа каналларини қайта тиклаш режалаштирилмоқда. Дипломатик мулоқотни ривожлантириш орқали икки давлат ўртасида ишончни мустаҳкамлаш ва барқарор келажак сари йўл очиш кўзда тутилмоқда.

 

Шунингдек, Ли Же-мёнг халқаро иқтисодий вазиятга ҳам тўхталиб ўтиб, глобал савдо ва хавфсизлик тизимидаги беқарорлик Жанубий Кореянинг “яшаб қолиш”ига таҳдид солаётганини қайд этди. У бу муаммоларга қарши ички сиёсий барқарорлик ва ташқи сиёсий мувозанат орқали курашишини маълум қилди.

 

Янги президентнинг сиёсий позицияси Жанубий Кореяда дипломатия, барқарорлик ва тинчлик йўлида янги босқичга киришаётганини англатади. У Шимолий Корея билан муносабатларни яхшилаш билан бирга, халқаро иттифоқларни мустаҳкамлаб, давлат хавфсизлигини икки йўналишда таъминлашга интилмоқда.