Ўзбекистонда жазирама бошланмоқда
Республикада ҳарорат 45-46 даражагача кўтарилиши мумкин.
"Ўзгидромет" хабарига кўра, 3 июль куни Ўзбекистон бўйлаб ҳаво ниҳоятда иссиқ бўлади. Айрим ҳудудларда ҳарорат 46 даражагача кўтарилиши мумкин. Шамол тезлиги эса баъзи жойларда чанг-тўзонлар билан бирга 25 м/с гача кучаяди.
Тошкентда ҳаво бироз булутли бўлиб, ёғингарчилик кутилмайди. Кечаси ҳарорат 23-25 даража, кундузи эса 39-41 даража иссиқ бўлади.
Қорақалпоғистон ва Хоразмда шамол кучайиб, чанг-тўзонлар кузатилиши мумкин. Кечаси 20-25, кундузи эса 37-42 даража атрофида бўлади.
Бухоро ва Навоий вилоятларида иссиқ авжида – кундузи ҳарорат 41-46 даражагача етади. Шамол 18 м/с гача кучайиб, айрим жойларда чанг-тўзонлар кўтарилиши мумкин.
Сирдарё, Жиззах, Самарқанд ва Қашқадарё вилоятларида ҳам кундузи 43 даражагача иссиқ кутилмоқда. Сурхондарёда эса айрим ҳудудларда ҳарорат 46 даражага етади.
Андижон, Наманган ва Фарғонада нисбатан салқинроқ бўлиб, ҳарорат 35-40 даража атрофида бўлади. Тоғли ҳудудларда эса кундузи 28-33 даража, кечаси 15-20 даража илиқ бўлади.
